ریت اس نگر کی ہے

تتلیوں کے موسم میں نوچنا گلابوں کا

ریت اس نگر کی ہے اور جانے کب سے ہے

دیکھ کر پرندوں کو باندھنا نشانوں کا

ریت اس نگر کی ہے اور جانے کب سے ہے

تم ابھی نئے ہو نا اس لئے پریشاں ہو

آسماں کی جانب تم اس طرح سے مت دیکھو

آفتیں جب آنی ہوں ٹوٹنا ستاروں کا

ریِت اس نگر کی ہے اور جانے کب سے ہے

شہر کے یہ باشندے نفرتوں کو بو کر بھی

انتظار کرتے ہیں فصل ہو محبت کی

چھوڑ کر حقیقت کو ڈھونڈنا سرابوں کا

ریِت اس نگر کی ہے اور جانے کب سے ہے

اجنبی فزاوں میں اجنبی مسافر سے

اپنے ہر تعلق کو دائمی سمجھ لینا

اور جب بچھڑ جانا مانگنا دعاوں کا

ریت اس نگر کی ہے اور جانے کب سے ہے

خامشی میرا شیوہ گفتگو ہنر انکا

میری بےگناہی کو لوگ کیسے مانیں گے

بات بات پر جب مانگنا حوالوں کا

ریت اس نگر کی ہے اور جانے کب سے ہے

مرغوب حسین طاہر

Questions & Answers